Vuere et opzions tes valadis ladinis
- Fonte: La Patre dal Friul
- Data: 12/04/2006
- Autore: Renzo Balzan
Si fevele impen di mont, intindint cun chest tiermin lis popolazions autoctonis (todescs e ladins) dal Sud Tirol che a paiarin un presit pesant intant de seconde vuere mondiâl. Dut câs, vuê ce che al reste di chestis vicendis e je la suponude simpatie pal Tierç Reich e il coinvolziment dal “Polizeiregiment Bozen” tal atentât di via Rasella a Rome, là che i 33 todescs muarts a jerin ducj sudtirolês, cul consecuent svindic dal macili des Fuessis Ardeatinis. Ma la realtât storiche – nus conte il saç di Lorenzo Baratter – e je divierse: oltri ae snazionalizazion sfuarçade dal Sud Tirol de bande dai fassiscj, al rivà daspò il tradiment dal acuardi dal 1939 tra Hitler e Mussolini, cu lis opzions, voludis soredut di Mussolini par fâ netisie etniche des popolazions autoctonis des valadis e dal menadôr todesc par vê cjar di canon. Cussì cetancj sudtirolês a lerin a murî sul front orientâl, ma un biel numar di lôr a muririn ancje sui fronts in Italie. Daspò i acjadiments dai 8 di Setembar dal 1943 e l’instituzion dal “Alpenvorland” che al cjapave dentri lis provinciis di Trent, di Bolsan e di Belum, di fat anetût al Reich, si vè in Sud Tirol il riclam “volontari” aes armis di ducj i oms valents. Par cui che si refudave di meti la divise de “Wehrmacht” a jerin proviodûts dai svindics ancje su la famee e la parintât. Viodûts dai caporions naziscj come mieçs talians – ju soravin juste apont come “Schweine” (purcits) o come “Tiroler Holzköpfe” (cjâfs di len) – a vignirin sometûts a un dûr adestrament par rindiju “Geschliffen”, o sei adatâts pal combatiment, cun risultâts, al semearès, avonde sclets. Par esempli il “Polizeiregiment Brixen” al refudà il zurament a Hitler, e par punizion al vignì mandât a bati inte Alte Slesie cuintri le Armade rosse sovietiche.
Un altri libri che al conte di chestis vicendis, cun particolâr riferiment ai Ladins dal Sud Tirol, al è il saç de professore ladine dal Fodom, Luciana Palla, che al à par titul “Opzioni, guerra e resistenza nelle valli ladine - Il diario di Fortunato Favai - Livinallongo 1939-1945” (Museo Storico in Trento e “Union Ladins Fodom”). Il diari di Fortunato Favai, recuperât de Palla, al conte di un ladin che al è stât dutun in chel protagonist e ossevadôr de vite dì par dì de comunitât di La Plì de Fodom (par talian Livinallongo) tal timp des opzions e de ocupazion todescje (1939-1945). Par chest, al rapresente un straordenari document di chei agns tormentâts, dulà che lis popolazions ladinis dolomitanis a forin cjapadis dentri intai progjets fûr dal vade dal Tierç Reich, cuintri ogni norme di derit internazionâl. Graziis a cheste sufierte testemoneance si à podût fâ almancul un pocje di clarece sun chei timps cussì nereôs pes vals ladinis, che di fats lis viodè comprometudis, cuintri de lôr volontât, cul nazisim. Acuse che tal daspò vuere ogni tant, naturalmentri a sproposit, e je stade tornade a tirâ fûr. Par capî miôr il contest, al tocje di sclarî che su la fonde dai acuardis talians-todescs dal 1939, firmâts a Rome ai 21 di Otubar, «…ducj i natîfs e origjinaris dal Sud Tirol /Alto Adige a varan, impreteribilmentri, di decidi seont libare cussience se restâ talians […] o deventâ citadins gjermanics par sintûts e lidrisâts sintiments e emigrâ par consecuence in Gjermanie, dulà che a cjataran ducj insiemit adun, plen ricognossiment morâl e degne e convenient sistemazion economiche». In chest acuardi a risultarin cjapadis dentri ancje lis popolazions ladinis de provincie di Bolsan (Badie e Gardene) e de provincie di Belum (La Plì de Fodom, Cuel S. Luzie e Anpezo). E vignì invezit lassade fûr la val di Fasse, in provincie di Trent, ancje se po daspò circje 300 fassans a rivarin a jessi acetâts come optants pal Reich todesc. Al è curiôs marcâ che insiemit a chescj fassans a poderin optâ pe Gjermanie ancje i cimbris e i mochens che a logavin in provincie di Trent, che a jerin piçulis comunitâts di antighe divignince todescje. Par chel che al inten il Friûl, chest acuardi al interessà dome la Valcjanâl / Kanaltal, o sei i comuns di Tarvis e di Malborghet-Valbrune. Ma si conte ancje che in timp di vuere i todescs a vessin puartât la stangje dal confin di Mont di Crôs a Cjasai Siee, fra Cleulis e Tamau/Tischlbong.
Dal libri de Palla o vignìn a savê che a La Plì de Fodom, suntune popolazion di circje 2 mil abitants, ai 31 di Decembar dal 1939 a vevin optât pe Gjermanie in 675, ma po e vignì concedude une proroghe di 6 mês e il numar al incressè inmò. A Cuel S. Luzie al optà il 18% de popolazion, là che invecit a Anpezo lis opzions a rivarìn a pene al 4%. Ma Cortine, tal timp dal fassisim, e jere gambiade cetant, soredut par vie dal svilup turistic che al veve puartât ventissù une vore di int foreste. Tant che al fo fintremai metût sù un comitât di anpezans “italianissimi”, metût adun scuasit nome di albiergadôrs vignûts di fûr.
Lis cjossis a mudarin di plante fûr daspò dai 8 di Setembar dal 1943, cuant che la ministrazion militâr todescje, cun a cjâf il comissari suprem Franz Hofer, e invià tes vals ladins dolomitanis une slargjade azion di intodescjament. Par esempli i Comuns di La Plì de Fodom, di Cuel S. Luzie e di Cortine a vignirin distacâts de provincie di Belum e zontâts cun chê di Bolsan. Di chel moment indenant no esistè plui nissune diference fra optants e no optants, dute la popolazion e fo obleade a dâ il so contribût in oms e cjossis pe vitorie dal esercit todesc. Intai Comuns, oms di fiducie dai naziscj a cjaparin la volte ai podestâs fassiscj, inmò e fo imponude la scuele todescje par ducj e la lenghe todescje e deventà uficiâl: La Plì de Fodom si clamà “Buchenstein”, Cuel S. Luzie “Versail” e Cortine “Hayden”.
Finide la vuere, a rivarin ancje lis acusis di colaborazionisim, cence masse disferenceâ fra volontarietât e necessitât. Come pai todescs, ancje pai ladins si metè in pîts l’acuse di vê prudelât il nazisim, cence nissun sfuarç storiografic par podê capî, di là dal judizi inmediât, lis resons dal compuartament dai abitants des vals dolomitanis e lis disferenceazions internis. Ni si considerà mai la particulâr situazion che si jere vignude a creâ, sul plan dai rapuarts politics e umans, cul passaç di chestis tieris, prime de Austrie a l’Italie, po dal fassisim al nazisim. In sumis timps cetant intrigôs che a àn lassât il lôr segn par agns a dilunc, e che nissun si augure che a vebin plui di tornâ.